ओली महाधिवेशनमा व्यस्त, प्रचण्ड–माधव संगठन विस्तारमा आक्रामक

यतिबेला पुष्पकमल दाहाल ‘प्रचण्ड’ र माधवकुमार नेपाल नेपाल कम्युनिस्ट पार्टी (नेकपा) को संगठन विस्तारमा तीव्र रूपमा सक्रिय छन्। १५ पार्टीबीचको एकीकरणपछि उनीहरू देशभर ‘सन्देशसभा’ सञ्चालन गर्दै छन्, जसअन्तर्गत चार प्रदेशमा सभा सम्पन्न भइसकेका छन्।

पार्टी केन्द्रीय कमिटी अझै पूर्ण नहुँदै प्रचण्ड–नेपाल देश दौडाहामा लागेका हुन्। उनीहरू नेकपालाई मुलुकको प्रमुख राजनीतिक शक्ति बनाउने दाबी गर्छन्। कांग्रेस र एमाले जनताबाट टाढिँदै गएको आरोप पनि उनीहरूकै भाषणमा सुन्न सकिन्छ।

जेनजी आन्दोलनको कारण एमाले अध्यक्ष केपी शर्मा ओली भएको उनीहरू केही समयदेखि खुला रूपमा आलोचना गरिरहेका छन्। आन्दोलनपछि प्रचण्ड–माधव र एमालेबाट असन्तुष्ट अन्य नेताहरू नेकपामा प्रवेश गरे, जसले संगठन विस्तारलाई झनै गति दिएको छ।

उता ओली आगामी मंसिर २७ देखि सुरु हुने एमाले महाधिवेशनको तयारीमा छन्। तेस्रोपटक अध्यक्ष बन्नका लागि सक्रिय भएका ओलीलाई वरिष्ठ उपाध्यक्ष ईश्वर पोखरेलले सीधा चुनौती दिन थालेका छन्। प्रतिनिधि चयनदेखि नेताहरू तान्ने प्रयाससम्म ओली गम्भीर देखिन्छन्। उपाध्यक्ष विष्णु पौडेल र उपमहासचिव पृथ्वीसुब्बा गुरुङलाई आफ्नो पक्षमा पारिएको समाचारसमेत बाहिर आएको छ।

यसबीच, ओलीमाथि प्रशासनले ‘स्थानहद’ लगाएको कारण उनी काठमाडौँ उपत्यकाबाट बाहिर जान अनुमति लिनुपर्ने अवस्था छ। यही कारण पोखरामा गर्ने भनिएको महाधिवेशन पनि काठमाडौँमै सारिएको छ।

जसताका नेकपा नेताहरू भने देशभर कार्यकर्ता भित्र्याउने र संगठन विस्तारमै केन्द्रित छन्। नेता हरिबोल गजुरेलका अनुसार एमालेभित्र असन्तुष्ट नेताहरूलाई नेकपामा प्रवेश गर्ने वातावरण सहज बनेको छ।
‘एमालेमा ओलीविरुद्ध बोल्नै नपाइने अवस्था छ। त्यस्तो अवस्थामा नेकपा मूल विकल्प बनेको छ,’ गजुरेल भन्छन्।

कांग्रेस भित्रको आन्तरिक विवाद र एमालेको महाधिवेशन व्यस्तताबीच नेकपाले दुवैको राजनीतिक कमजोरीको फाइदा उठाउँदै चुनावमुखी अभियान पनि अघि बढाइरहेको छ।
‘जनतालाई हाम्रो धारणा बुझाउने काम त गर्नुपर्छ,’ नेकपा नेता सोमप्रसाद पाण्डेयले भने।