ताजा अपडेट
पार्टीको आधिकारिक निर्णय विपरीत एमाले नेतृत्वको सरकारमा सहभागी बनेकी राष्ट्रिय प्रजातन्त्र पार्टी (राप्रपा) मधेश प्रदेशकी सांसद कञ्चन बिच्छा पदमुक्त हुने भएकी छन् । राप्रपाको सिफारिसमा उनलाई पदबाट हटाउने प्रक्रिया अघि बढाइएको हो ।
कार्य परामर्श समितिमा भएको सहमतिअनुसार आज बुधबार मुख्यमन्त्री सरोज कुमार यादव विश्वासको मत लिने कार्यक्रम रहेकाले पदमुक्तसम्बन्धी औपचारिक सूचना भने भोलि बिहीबार मात्र टाँस गरिने भएको छ । हाउस कल भएको दिन पदमुक्त गर्न नमिल्ने भएकाले बिहीबार उनलाई औपचारिक रूपमा बर्खास्त गरिने एक सहभागी सदस्यले जानकारी दिए ।
सांसद बिच्छा कात्तिक २४ गते सरोजकुमार यादव नेतृत्वको सरकारमा वनमन्त्री बनेकी थिइन् । पार्टीले सरकारबाट फिर्ता हुन निर्देशन दिए पनि उनले अटेर गरेपछि राप्रपाले स्पष्टीकरण सोधेको थियो । तर उनले स्पष्टीकरणमा कुनै जवाफ नदिएपछि पार्टीले साधारण सदस्यसमेत नरहने गरी सांसद पदबाट फिर्ता बोलाउने सिफारिस गरेको हो ।
यससँगै कञ्चन बिच्छाको मन्त्री र सांसद दुवै पद गुमेको छ ।
