सुदन गुरुङको गृहमन्त्रीमाथि कडा प्रश्न: ‘सानालाई ऐन, ठुलालाई चैन’ संविधानमा कहाँ लेखिएको छ?

जेन–जी आन्दोलनका अगुवा सुदन गुरुङले सामाजिक सञ्जालमार्फत गृहमन्त्रीको भूमिकामाथि तीव्र आलोचना गर्दै राज्यमा दोहोरो मापदण्ड कायम रहेको आरोप लगाएका छन्।

उनले दुर्गा प्रसाईले समाजमा विभाजन बढाउने भड्काउ अभिव्यक्ति दिएको र आफूले नागरिकता पाएको मिति समेत तोडमोड गरी भ्रम फैलाएको दाबी गर्दै गृहमन्त्रीले यस्ता व्यक्तिहरूलाई कानूनी रूपमा समान रूपमा कारबाही गर्न नसकेको टिप्पणी गरेका छन्।

गुरुङले भने, “दुर्गा प्रसाईपछि अझ कट्टर र उत्तेजक भाषा प्रयोग गर्नेहरू खुलेआम हिँडिरहेका छन्। शान्तिपूर्ण आन्दोलनमा उभिएका युवाको टाउकोमै लक्षित गरी गोली चलाउने पनि तिनै हुन्।

तर गृहमन्त्रीले तिनै व्यक्तिलाई समातेर छानबिन गर्ने साहस देखाउन सकेनन्।”

संविधानविद् र राज्यको प्रति आक्रोश व्यक्त गर्दै उनले थपे, “संविधानको कुन धारामा ‘सानालाई ऐन, ठुलालाई चैन’ लेखिएको छ? विधिको शासन नै लागू नहुने हो भने पुरानो शासन र अहिलेको बीचमा भिन्नता के रह्यो, गृहमन्त्रीज्यू?”

उनका अनुसार, न्याय मागिरहेका मृतक र घाइते युवाहरूको पीडा सुन्न सरकार तैयार छैन।

“कलिला युवाहरूको रगत, पसिना र बलिदानीकै आधारमा गृहमन्त्री कुर्सीमा बसेका छन्।

तर त्यही युवामाथि कारबाही गर्न आयोगको प्रतिवेदन कुर्नु परेन, शक्तिशालीहरू भने खुलेआम हिँडिरहेका छन्,” उनले आरोप लगाएका छन्।

गुरुङले अन्त्यमा भने, “मृतक र घाइतेहरूको न्यायपूर्ण सम्बोधन तथा सबै नागरिकलाई समान न्यायको भरोसा बिना चुनाव सम्भव हुँदैन।”