प्रधानमन्त्री कार्कीको नेतृत्वमा पहिलोपटक राष्ट्रिय सुरक्षा परिषद् बैठक बस्दै किन ?

प्रधानमन्त्री सुशीला कार्कीले पदभार ग्रहण गरेपछि पहिलोपटक राष्ट्रिय सुरक्षा परिषद् (NSC) बैठक बस्ने तयारी भएको छ। प्रधानमन्त्री कार्यालय स्रोतका अनुसार आगामी केही दिनभित्रै उक्त बैठक सिंहदरबारमा आह्वान गरिनेछ।

बैठकमा हालको राजनीतिक अस्थिरता, भूराजनीतिक अवस्था, सीमापार सुरक्षासम्बन्धी चुनौती र आन्तरिक शान्ति–सुरक्षा व्यवस्थाबारे विस्तृत छलफल हुने बताइएको छ। प्रधानमन्त्री कार्कीले प्रधानमन्त्री बनेलगत्तै राष्ट्रिय सुरक्षा संयन्त्रलाई सुदृढ बनाउन प्राथमिकता दिने घोषणा गरेकी थिइन्।

प्रधानमन्त्री कार्यालयका एक अधिकारीका अनुसार, “प्रधानमन्त्रीज्यूले राष्ट्रिय सुरक्षासम्बन्धी नीति, रणनीति र तत्कालीन सुरक्षा अवस्थाबारे सबै पक्षसँग समन्वय गर्न चाहनु भएको छ। यही सन्दर्भमा परिषद् बैठक बस्न लागिएको हो।”

बैठकमा रक्षा, गृहमन्त्री, परराष्ट्रमन्त्री, सेनापति, राष्ट्रिय अनुसन्धान विभागका प्रमुख लगायतका उच्च अधिकारीहरूको उपस्थिति रहनेछ। यस बैठकमा पछिल्ला आन्दोलन, सीमापार गतिविधि, र मुलुकको सुरक्षा संवेदनशीलताबारे प्रतिवेदन प्रस्तुत हुने अपेक्षा गरिएको छ।

प्रधानमन्त्री कार्कीले यसअघि नै सुरक्षा निकायका प्रमुखहरूसँग छुट्टाछुट्टै भेट गर्दै समन्वय र पारदर्शिता बढाउने आश्वासन दिएकी थिइन्। उनका नजिकका स्रोतका अनुसार, उनले “राजनीतिक परिवर्तनको संवेदनशील अवस्थामा राष्ट्रिय सुरक्षालाई राजनीतिक स्वार्थभन्दा माथि राख्नुपर्ने” बताएकी छन्।

विश्लेषकहरूले कार्कीको पहिलो सुरक्षा परिषद् बैठकलाई “नयाँ प्रशासनिक र सुरक्षा दृष्टिकोणको परीक्षण” को रूपमा हेरेका छन्।