अर्जेन्टिनामा सङ्क्रमित फेन्टानिलका कारण कम्तीमा ८७ जनाको मृत्यु, अनुसन्धान जारी

अर्जेन्टिनामा ब्याक्टेरियाबाट सङ्क्रमित फेन्टानिलको मात्रा बिरामीलाई दिँदा कम्तीमा ८७ जनाको मृत्यु भएको छ। गत मेदेखि अदालतले क्लेबसिएला निमोनिया र राल्स्टोनिया पिकेटी नामक ब्याक्टेरियाबाट दूषित औषधिको प्रयोगका कारण भएका मृत्युसम्बन्धी सत्य पत्ता लगाउने प्रयास गरिरहेको छ।

मृतकका परिवारले न्यायको माग गर्दै विभिन्न अस्पताल बाहिर प्रदर्शन गरेका छन्। औषधि नियामक निकाय अनमत को उजुरीका आधारमा अनुसन्धान सुरु भएको हो, जसमा सङ्क्रमित औषधिले बिरामीको स्वास्थ्य अवस्था बिगारिएको र कतिपयको मृत्यु भएको आरोप छ।

न्यायाधीश अर्नेस्टो क्रेप्लाकका अनुसार ब्यूनस आयर्ससहित तीन अन्य प्रान्तमा पनि मृत्युका घटना भएका छन्। कम्तीमा २४ जनासँग सोधपुछ गरिएको छ र उनीहरूको सम्पत्ति जफत गरिएको छ। एचएलबी फर्मा र रामालो ल्याबोरेटरीजका मालिक एरियल फुर्फारो गार्सियालाई औषधि प्रयोगमा सावधानी नअपनाएको अभियोगमा पक्राउ गरिएको भए पनि उनले आरोप अस्वीकार गरेका छन्।

रिपोर्टअनुसार, देशका आठ अस्पतालमा दूषित औषधिका पाँच ब्याच वितरण भएका थिए र २०० अस्पतालको क्लिनिकल हिस्ट्री अध्ययन गरिएको छ। मृतकका आफन्तहरूले “फेन्टानिल पीडितका लागि न्याय” को माग गर्दै प्रदर्शन गरिरहेका छन्।

विशेषज्ञहरूले नयाँ मेडिकल रेकर्ड समीक्षा गर्दै अस्पतालहरूमा सङ्क्रमितको सङ्ख्या पुष्टि गरिरहेका छन्। यद्यपि, अहिलेसम्मका आधिकारिक रिपोर्टहरूमा कुनै पनि मृत्यु प्रत्यक्ष रूपमा फेन्टानिलसँग सम्बन्धित भएको पुष्टि भएको छैन। संसद्ले यस मामिलामा सरकारलाई २६ वटा प्रश्न पठाएको छ तर जवाफ दिने समयसीमा तोकिएको छैन।