झारखण्डमा तीर्थयात्री बोकेको बस दुर्घटना : १८ जनाको ज्यान गयो

मङ्गलबार भारतको झारखण्ड राज्यमा एक दुखद सडक दुर्घटनामा कम्तीमा १८ जना हिन्दू तीर्थयात्रीको ज्यान गएको छ। खाना पकाउने ग्यास सिलिन्डर बोकेको ट्रकसँग तीर्थयात्रीहरू सवार बस ठोक्किएपछि यो भयावह दुर्घटना भएको हो।

दुर्घटनापछि प्राप्त दृश्यहरूमा बस पूर्णरूपमा जलेको देखिन्छ, विशेषगरी पछाडिको भाग पूरै नष्ट भएको थियो। स्थानीय सांसद निशिकान्त दुबेका अनुसार तीर्थयात्रीहरू श्रावण महिनाको अवसरमा भगवान् शिवलाई अर्पण गर्न गङ्गाको पवित्र पानी बोकेर धार्मिक स्थलतर्फ गइरहेका थिए।

सांसद दुबेले सामाजिक सञ्जालमार्फत “बस र ट्रकको ठोक्किँदा १८ भक्तजनको मृत्यु भएको” जानकारी दिनुभयो।
प्रधानमन्त्री नरेन्द्र मोदीले मृतकप्रति गहिरो समवेदना व्यक्त गर्दै घटनालाई “अत्यन्त दुःखद” बताएका छन्। उनकाे कार्यालयले पनि सामाजिक सञ्जालमार्फत झारखण्डको देवघरमा भएको यो दुर्घटनाप्रति दुःख व्यक्त गरेको छ।

भारतमा हरेक वर्ष हजारौँ मानिस सडक दुर्घटनामा ज्यान गुमाउने तथ्याङ्क सार्वजनिक हुँदै आएको छ। यातायातमन्त्री नितिन गडकरीले सन् २०२३ मा मात्र १ लाख ७२ हजारभन्दा बढीको मृत्यु भएको जानकारी संसदमा दिएका थिए।

यसअघि पनि गत नोभेम्बरमा उत्तराखण्डमा भएको बस दुर्घटनामा ३६ जनाको ज्यान गएको थियो। यो पछिल्लो घटना भारतको सडक सुरक्षासम्बन्धी चुनौतीलाई पुनः उजागर गर्ने उदाहरण बनेको छ।