बागमतीमा कांग्रेसभित्र गम्भीर विभाजन : बहादुरसिंह लामाले गुमाए संसदीय दल नेताको पद

डेस्क रिपोर्टर

२०८२ श्रावण १३ मंगलवार संग्रह

4.9k Shares

बागमती प्रदेशमा नेपाली कांग्रेसका संसदीय दल नेता बहादुरसिंह लामाले विश्वासको मत गुमाएका छन्। उनलाई हटाउन दर्ता गरिएको अविश्वासको प्रस्तावमा २२ जना सांसदले समर्थन जनाएका छन् भने उनको पक्षमा मात्र १५ सांसद उभिएका छन्। कुल ३७ जना कांग्रेस सांसदमध्ये बहुमतले असन्तुष्टि जनाएपछि लामा संसदीय दलको नेताबाट हटेका हुन्।

अविश्वासको प्रस्तावमा मंगलबार एक सांसद थपिँदै संख्यामा बलियो पक्ष बनेको हो। मन्त्री पदबाट राजीनामा दिएका श्याम खड्का लामाको विपक्षमा उभिएका छन्। लामाले विश्वासको मत गुमाउनुमा केन्द्रको राजनीतिक खिचातानीले पनि भूमिका खेलेको देखिन्छ।

महामन्त्री गगन थापाको पक्षधर नेताहरू—पुकार महर्जन, प्रभात तामाङ, छिरिङ दोर्जे लामा, मीना पराजुली, याङकिला शेर्पा, सुरजचन्द्र लामिछाने, सुरेश श्रेष्ठ, र श्रीराम लामिछाने—लामाको विपक्षमा देखिएका छन्।

अर्कोतर्फ, डा. शेखर कोइराला पक्षधर रमेश महत र उत्तम जोशी भने लामाको पक्षमा उभिएका छन्। पार्टी सभापति शेरबहादुर देउवा निकटका सांसदहरू र नेता प्रकाशमान सिंह पक्षधरहरू पनि दुई धारमा विभाजित भएका छन्। सिंहनिकट कञ्चन वादे र दिपेन्द्र श्रेष्ठले लामाविरुद्ध मत दिए भने हरिप्रभा खड्गी भने उनको पक्षमा रहिन्।

प्रवक्ता डा. प्रकाशशरण महत निकट मानिएका श्याम खड्का पनि लामाविरुद्धको प्रस्तावमा सहभागी भए।