ताजा अपडेट
काठमाडौं: नेपाली कांग्रेसले आफ्ना जिल्ला सभापतिहरूलाई नेपाल किसान महासंघको आसन्न जिल्ला अधिवेशन सम्पन्न गर्न सहयोग, समन्वय र सहजीकरण गर्न निर्देशन दिएको छ। यो आदेश शुक्रबार पार्टी केन्द्रीय कार्यालयले ७७ वटै जिल्ला सभापतिहरूलाई परिपत्रमार्फत जारी गरेको हो।
कांग्रेसले महाधिवेशन गर्न बाँकी रहेका भ्रातृ संगठनहरूको केन्द्रीय महाधिवेशन आगामी चैत मसान्तभित्र सक्ने निर्णय गरिसकेको छ। यसैअनुसार किसान महासंघको केन्द्रीय तदर्थ समितिले फागुन ७ गते सबै जिल्लामा अधिवेशन गर्ने घोषणा गरेको छ। तर, पार्टीले जिल्ला तहका नेताहरूलाई निर्देशन जारी गर्दै यस्तो कामका लागि ‘सहयोग गरिदिनु’ भनेर विशेष अनुरोध गरेको छ, जसले संगठनभित्रको व्यवस्थापन अन्योलपूर्ण रहेको आभास गराएको छ।
कांग्रेसका मुख्य सचिव कृष्णप्रसाद पौडेलले हस्ताक्षर गरेको परिपत्रमा भनिएको छ, “नेपाल किसान महासंघको जिल्ला अधिवेशन सम्पन्न गर्नका लागि नेपाली कांग्रेस जिल्ला कार्यसमितिको तर्फबाट आवश्यक सहयोग, समन्वय र सहजीकरण गरिदिनु हुन अनुरोध छ।”
कांग्रेस नेतृत्वले भ्रातृ संगठनहरूलाई समयमै अधिवेशन सम्पन्न गर्न दबाब दिएको देखिए पनि, जमीनीस्तरमा क्रियाशील नेताहरूबीच निर्णयप्रति आशंका र असन्तुष्टिको संकेत देखिन थालेको छ।
