जेनजी आन्दोलनमा मृत्यु भएका शवको पोस्टमार्टम सुरु

सोमबारको जेनजी प्रदर्शनमा मृत्यु भएका शवको पोस्टमार्टम त्रिवि शिक्षण अस्पतालमा सुरु भएको छ। फरेन्सिक विभाग प्रमुख डा. गोपाल चौधरीका अनुसार हालसम्म ३६ वटा शव विभागमा पुगेका छन्, जसमध्ये ९ वटा शवको पोस्टमार्टम प्रक्रिया सुरु भएको हो।

डा. चौधरीले जिल्ला प्रहरी परिसर काठमाडौंबाट पत्र ल्याएको अवस्थामा मात्रै पोस्टमार्टम गरिने जानकारी दिए। अहिलेसम्म ९ जना आफन्तले पत्र बुझाएका छन् र ती शव पोस्टमार्टमपछि परिवारलाई जिम्मा लगाइनेछ।

शवको बाहिरी र भित्री जाँच गरेर मृत्युको कारण पत्ता लगाइन्छ। गोली लागेको केसमा पनि अन्तर्राष्ट्रिय मापदण्डअनुसार एंगल, इन्ट्री र एक्जिट पोइन्ट जस्ता विवरण संकलन गरिनेछ।

हालसम्म स्वास्थ्य मन्त्रालयले आन्दोलनका क्रममा ३६ जनाको मृत्यु र १,७७१ जना घाइते भएको पुष्टि गरेको छ। जसमध्ये २८४ जना अझै अस्पतालमा भर्ना भएर उपचाररत छन्।