ताजा अपडेट
नेपाल चिकित्सक संघले उपभोक्ता अदालतको पछिल्लो फैसलाले नेपाल मेडिकल काउन्सिलको क्षेत्राधिकारमाथि हस्तक्षेप गरेको भन्दै आज देशभर आकस्मिक बाहेकका स्वास्थ्य सेवा ठप्प पारेको छ।
संघले असार १७ गतेदेखि चिकित्सक र स्वास्थ्यकर्मीहरूलाई कालोपट्टी बाँधेर सेवा प्रदान गर्न आह्वान गरेको थियो। आज भने आकस्मिक बाहेकका सबै सेवा रोकेको छ। संघले चिकित्सकीय मुद्दाहरूको सुनुवाइ मेडिकल काउन्सिलमा मात्र सीमित गर्न कानुन संशोधनको माग गरेको छ र आवश्यक परे कडा आन्दोलन गर्ने चेतावनी दिएको छ।
हालै उपभोक्ता अदालतले उपचारमा लापरवाही गरेको आरोपमा बिरामीका आफन्तको पक्षमा फैसला सुनाएको थियो। अदालतले ओम अस्पताललाई ५० लाख ७० हजार, हिमाल अस्पताल र सम्बन्धित चिकित्सकलाई १ करोड ४५ लाख, र ग्राण्डी सिटी अस्पताल तथा त्यहाँका चिकित्सकलाई ५७ लाख रुपैयाँ क्षतिपूर्ति बिरामी पक्षलाई तिर्न आदेश दिएको थियो।
