सुनसरी। राष्ट्रिय स्वतन्त्र पार्टीका नेता महानन्द यादवले देवानगञ्ज क्षेत्रमा बढ्दो चोरीका घटनाप्रति गम्भीर चिन्ता व्यक्त गर्दै इलाका प्रहरी कार्यालय देवानगञ्जको भूमिकामाथि प्रश्न उठाउनुभएको छ । उहाँका अनुसार हाल कार्यरत प्रहरी टोलीको निष्क्रियता र कमजोर सुरक्षा व्यवस्थाका कारण गाउँपालिकामा चोरीका घटना दिनानुदिन बढिरहेका छन् ।
देवानगञ्ज गाउँपालिकाका अधिकांश नागरिक किसान हुन् । दिनभर खेतबारीमा पसिना बगाएर राति घर फर्किने सर्वसाधारण अहिले आफ्नै घर, धनसम्पत्ति र पशुचौपायाको सुरक्षाप्रति त्रसित बनेका छन् । पछिल्लो समय गाउँका विभिन्न स्थानमा लगातार चोरीका घटना भइरहँदा पनि इलाका प्रहरी कार्यालय देवानगञ्जले प्रभावकारी रूपमा सुरक्षा व्यवस्था मिलाउन नसकेको भन्दै स्थानीयवासी आक्रोशित बनेका छन् ।
विशेषगरी गाईभैंसी चोरीका घटनाले दक्षिण भेगका नागरिकलाई थप आतंकित बनाएको छ । वडा नं.–१ का बालकृष्ण मेहताले चोरी भएको आफ्नै भैंसी भारतपारिबाट फिर्ता ल्याउन चोर पक्षलाई नगद १ लाख रुपैयाँ बुझाउनुपरेको गुनासो गर्नुभएको छ । त्यस्तै, जितु मेहताको गाई र बाछो चोरी भएपछि ठूलो रकम तिरेर आफ्नै पशु फिर्ता ल्याउन बाध्य भएको स्थानीयहरूको भनाइ छ ।
स्थानीयवासीका अनुसार गाउँघरमा घुमेर कसको घरमा कति गाईभैंसी छन्, कहाँ पशु बाँधिएको छ भन्ने सूचना संकलन गरी चोर समूहलाई सुराकी दिने गिरोह नै सक्रिय रहेको आशंका गरिएको छ । गाउँमै बसेर चोरलाई लोकेसन दिने, रातिको समयमा चोरी गराउन सहयोग गर्ने र नागरिकमा त्रास फैलाउने काम भइरहेको आरोपसमेत स्थानीयहरूले लगाएका छन् ।
तर यति गम्भीर अवस्था हुँदासमेत इलाका प्रहरी कार्यालय देवानगञ्ज भने मौन देखिएको स्थानीयहरूको आरोप छ । पटक–पटक जानकारी गराउँदा पनि प्रहरीको नियमित रात्री गस्ती नहुनु, चोरीमा संलग्न समूह पहिचान गर्न नसक्नु तथा सीमा क्षेत्रमा निगरानी कमजोर हुनु प्रहरी प्रशासनकै लापरवाही भएको नागरिकहरूको भनाइ छ ।
स्थानीयहरूले केही प्रहरी कर्मचारीको भूमिकामाथि समेत शंका व्यक्त गर्दै चोर समूह र प्रहरीबीच मिलेमतो हुनसक्ने आशंका गरेका छन् । यद्यपि, यस विषयमा निष्पक्ष छानबिन गरी सत्यतथ्य सार्वजनिक गर्नुपर्ने माग उठिरहेको छ ।
महानन्द यादवले हालको प्रहरी टोलीलाई तत्काल सरुवा गरी नयाँ र सक्रिय टोली खटाउनुपर्ने माग गर्नुभएको छ । उहाँले नागरिकको सुरक्षाप्रति गम्भीर बन्न नसक्ने प्रहरी प्रशासन जनताको भरोसाको केन्द्र बन्न नसक्ने बताउनुभयो ।
स्थानीयवासीहरूले देवानगञ्ज गाउँपालिकाभर नियमित रात्री गस्ती, शंकास्पद गतिविधिमाथि निगरानी, चोरीमा संलग्न गिरोहको पहिचान तथा सीमा क्षेत्रमा कडा सुरक्षा व्यवस्था लागू गर्न प्रशासनसँग जोडदार माग गरेका छन् । समयमै प्रभावकारी कदम नचालिए देवानगञ्जमा चोरी आतंक अझ भयावह बन्न सक्ने भन्दै नागरिकहरूले चिन्ता व्यक्त गरेका छन् ।
ट्रेन्डिङ
.jpeg)
