ताजा अपडेट
जुम्लाबाट सुर्खेततर्फ जाँदै गरेको एक फोर्स गाडी दुर्घटना हुँदा सात जना यात्रु घाइते भएका छन्। कर्णाली राजमार्गअन्तर्गत कालिकोटको खाँडाचक्र–१०, गोलुवा क्षेत्रमा शुक्रबार बिहान भएको दुर्घटनामा पाँच जना गम्भीर र दुई जना सामान्य घाइते भएको जिल्ला प्रहरी कार्यालय जुम्लाका डिएसपी रविन बाबु रेग्मीले जानकारी दिएका छन्।
बा. १ झ ०९७६ नम्बरको गाडी अनियन्त्रित भई करिब एक सय मिटर तल खसेको बताइएको छ। दुर्घटनास्थल कालिकोटमा पर्ने भएकाले त्यहाँको प्रहरी कार्यालयमार्फत जानकारी प्राप्त भएको र तत्कालै कालिकोटबाट प्रहरीको टोली घटनास्थलतर्फ पठाइएको प्रहरीले जनाएको छ।
घाइतेहरूको विस्तृत विवरण भने अहिलेसम्म आउन बाँकी छ।
