चितवनमा २५ हजारभन्दा बढी घरपरिवार बाढी–पहिरोको जोखिममा, प्रशासनद्वारा उच्च सतर्कता

चितवन जिल्लामा वर्षातका कारण बाढी र पहिरोको उच्च जोखिममा २५ हजार ७३३ घरपरिवार रहेको पाइएको छ। प्रमुख जिल्ला अधिकारी प्रकाश पौडेलका अनुसार जिल्लाका सात पालिकाका करिब १ लाख २८ हजार ६६५ जनसंख्या प्रत्यक्ष रूपमा प्रभावित हुने देखिएको छ।

सबैभन्दा बढी जोखिम पूर्वी चितवनको राप्ती नगरपालिकामा देखिएको छ, जहाँ १० हजार १०९ घरपरिवार र ५० हजार ९५० जना प्रभावित हुनसक्ने प्रारम्भिक अनुमान गरिएको छ।

जिल्ला विपद् व्यवस्थापन समितिको विवरण अनुसार अन्य प्रभावित क्षेत्रहरू यस प्रकार छन्:

• भरतपुर महानगरपालिका: ६,६३५ घर, ३३,१७५ व्यक्ति

• माडी नगरपालिका: ३,९४६ घर, १९,७३० व्यक्ति

• रत्ननगर नगरपालिका: २,३८१ घर, ११,९०५ व्यक्ति

• कालिका नगरपालिका: १,००५ घर, ५,०२५ व्यक्ति

• खैरहनी नगरपालिका: ३२० घर, १,६०० व्यक्ति

• इच्छाकामना गाउँपालिका: १,२५६ घर, ६,२८० व्यक्ति

प्रमुख जिल्ला अधिकारी पौडेलका अनुसार बाढीको सम्भावित क्षति न्यूनीकरणका लागि आवश्यक सबै सुरक्षा पूर्वतयारी गरिएको छ। नदी किनाराका बासिन्दालाई उच्च सतर्कता अपनाउन आग्रह गरिएको छ भने उद्धार, राहत, र स्वास्थ्य सामग्री तयारी अवस्थामा राखिएको छ।

चितवन जिल्लामा नारायणी, त्रिशुली, राप्ती, लोथर, रिउखोला, र कयर खोला जस्ता नदी र खोलाहरूले प्रमुख जोखिम पैदा गर्ने गरेको छ। नारायणी नदीमा बनेको तटबन्धनले केही सुरक्षा गरे पनि तटबन्ध नभएका क्षेत्र अझै उच्च जोखिममा रहेको बताइएको छ।

साना र ठाडा खोलाहरूको बहावले पूर्वी चितवनमा थप जोखिम सिर्जना गर्न सक्ने भएकाले प्रशासनले स्थलगत निरीक्षण र सतर्कता बढाएको जनाएको छ।