बजेटप्रति विरोधको असंगति : समर्थन दिएपछि असन्तुष्टि किन?

जनता समाजवादी पार्टी (जसपा) नेपालले सरकारले ल्याएको आर्थिक वर्ष २०८२/०८३ को बजेटलाई "असन्तुलित र पूर्वाग्रहित" भन्दै आलोचना गर्दै समर्थन फिर्ता लिएको छ। यद्यपि, प्रतिनिधिसभामा बजेट पारित हुँदा जसपा स्वयं पक्षमा मतदान गरेको थियो।

बजेट गत जेठ १५ गते संघीय संसद्मा प्रस्तुत गरिएको थियो, जसमा मन्त्रालयगत छलफलपछि असार १० गते प्रतिनिधिसभा र असार १८ गते राष्ट्रिय सभाबाट पारित भई असार ३० गते राष्ट्रपतिबाट प्रमाणीकरण भएको हो।

बजेटमाथि छलफलमा भाग लिई समर्थन जनाइसकेको जसपाले पछि आएर त्यसलाई असन्तुलित भनी टिप्पणी गर्नु राजनीतिक असंगति जस्तो देखिएको छ। सत्तामा रहँदा नै आलोचना वा सुझाव राख्ने अवसर हुँदाहुँदै पनि समर्थनपछि मात्र विरोध गर्नुप्रति प्रश्न उठेको छ।

त्यस्तै, प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाल 'प्रचण्ड'ले पनि बजेट समावेशी नभएको, नवधनाढ्य र पहुँचवालाका लागि मात्र लक्षित रहेको टिप्पणी गरेका छन्।

प्रचण्डले गणतन्त्रमाथि खतरा बढेको भन्दै क्रान्तिकारी र समाजवादमुखी बजेट आवश्यक भएको उल्लेख गरेका थिए। तथापि, उनले पनि बजेट पास भइसकेपछि मात्र आलोचना गरेका हुन्। यदि संसद्मै छलफलका क्रममा यस्ता सुझाव वा विरोध गरिएको भए त्यसको अर्थ र प्रभाव थप सशक्त हुन सक्ने राजनीतिक विश्लेषकहरूको टिप्पणी छ।